Дуьзмиш хьанач зи и сефер,
Са кIус геж атун тахьана.
Бада фена йикъар - йифер,
Гьич са затI кьатIун тахьана.
Метлеб амукьна зи рикIе,
Заз хажалат хьана еке - .
Азиз юлдаш Максим Горки,
Я гьам заз акун тахьана.
Гьелбетда, зи кьве вилин экв -
Заз акуниз пара герек,
Санал кьведа са кIус хуьрек,
Чай хъун, я фу тIуьн тахьана.
Шаир юлдашарин адет -
Арада гьуьрмет, муьгьуьббет,
Сада садав ширин суьгьбет
Ийиз ацукьун тахьана.
КIан хьанач а кар зи чандиз.
Нихъ хьана фин зун дувандиз?
Хтун хьана Дагъустандиз,
Гъавурда гьатун тахьана.
СтIал Сулейман я зи тIвар,
Зазни чида тIимил затIар.
Жуваз течир ихтилатар
Мад артух кIватIун тахьана.
I936
Рубрика
Добавить комментарий