Лагълагъчи

Фагьумна за бязи фекъир 
Гьич са затI течиз рахада. 
Фагьум тийиз эвел - эхир, 
Бес ам акI вучиз рахада?

ЛагьайтIа на кардин тирвал, 
Кепекдай кьач гьич ви чирвал, 
Вуч атайтIан вичин сивял, 
Гъавурдик квачиз рахада.

Я ужуз чидач, я масан, 
Я пис чидайд туш, я хъсан:
Уьмуьр хьана вичин виш сан, 
Гьич са затI гвачиз рахада.

Вичин акьул вичиз дерин, 
Шумуд ахмакьдиз за чирин! 
Хатадайни са гаф ширин, 
Гьамиша тушиз рахада.

Я пут чидайд туш, я мискьал, 
Я яргъал чидач, я мукьвал. 
ГьакI нубатсуз ийида къал, 
Лап келле ичIиз рахада.

Сулейманан веревирдер 
Лугьунар я ихьтин бейтер. 
Хьайилахъди бязи дердер, 
Гьелбет, вич вичиз рахада.