Дербент шегьердиз

Фикирдиз гъваш: вири дуьне -
И шегьердин суракь ава.
Дербент лугьуз сифте бине
Кутуник хупI дамах ава.

Ажеб гуьзел шегьер я им,
Гьич тежедай тегьер я им,
ЦипицIрин бул бегьер я им,
Гьар камуна са багъ ава.

Багъдатдиз ухшар я шикил,
Ачух жеда гьар са гуьгьуьл,
Са пад я дагъ, са падни гьуьл,
Майдан, къурух, яйлах ава.

Гьализ балкIан, гьализ файтун,
Гур я кIвалах хъуьтIуьн-гатун.
Бухарадин бармак, палтун
АлукIунин саягъ ава.

Карвансара, чайхана бул,
Анжах кIанда жибинда пул.
Табасаран-, къажар-, мугъулдиз
Лезгидин къужах ава.

Рахадайла мецер ширин,
Агьалияр акьул дерин,
КIватI жез санал багъда серин,
Чаргьавизни булах ава.

КIуьд куьчеда жерге-жерге
Мусурманрин кIвалер еке.
ЧIижер кул хьиз авай куькве
Базарра вуч лагъ-лагъ ава!

Садбур миях, садбурни ях,
Гьамбал кIулал алаз къалтах,
Фияр, Хпеж - магьир кIвалахдай
УстIаррин даях ава.

УстIарар я куьче-куьче,
Гьардаз ава вичин пеше.
Пенжерайра буьлуьл, шуьше,
Гьаят, балхун, утагъ ава.

Мугьманар къвез гьар чкадай,
Гьам Ахцегьай, гьам Къубадай,
Аштерхандай, гьакI Шурадай,
Гьардаз ина къунагъ ава.

Гьам Бакуда, гьам Ширванда
Ви ад ава, пара кIанда.
Асландин рикI аваз чанда,
Ваз ахъа тир къужах ава.

СтIал Сулейман гьич гафар
Рахадайд туш алачиз кар.
Магьшур я ви вири затIар -
НеренкIеле, Каспидин тIвар
Дуьняда ви дамах ава.

1886-1890