Самурска Нажмудиназ салам - дуьа

Эвел, зи играми стха 
Нажмудиназ салам - дуьа. 
Вич дагъвийрин кьегьал арха, 
Мад адаз зи салам - дуьа.

Хабар кьадай даим чакай, 
Абад хьуй ам авай чка. 
Яшамишрай Самурска, 
Адаз пара салам - дуьа.

Гьелбет, адаз зи мецелай 
Хийир рахун я кIевелай. 
Къарагъзавай лап рикIелай 
Артух алаз салам - дуьа.

Хьурай вичин кефи къумбар, 
Гуьгьуьл шад яз, уьмуьр санбар.
Тамам дуьньядив барабар,
 Гьакьван зурбаз салам - дуьа.

Амай юлдашарни вири, 
Яшамишрай куьлуь, ири. 
Мад авач захъ метлеб гьейри, 
Зи гаф - адаз салам - дуьа.

Хабар кьуртIа мад чи гьалар, 
Сагъ - саламат я аялар. 
Амач маса гафар, чIалар, 
Гьа и кагъаз - салам - дуьа.

Зун я хьи шаир Сулейман, 
Куьн сагъ хьун я зи эрзиман, 
Чун жузадай дустар масан, 
Квез виридаз салам - дуьа.