Юлдашар, заз са ван хьана:
Московда кIватIал рушарин,
Тамам дуьньядиз чкIана
Хьай гьал - агьвалат рушарин.
Игитвилер хьана машгьур,
Гьар са пеше авуна чир,
Гьинал хьайтIан сифте учир
Хьана первый раз рушарин.
ЦIикьвед варз я йисан асул,
Хийир къведай пуд варз я зул.
Артух жеда гьар са магьсул -
ТуькIвейд я калхуз рушарин.
Дишегьли юлдашар вири
Савхуз хьана куьлуь, ири,
Чи регьбер тир юлдашари
Хвена кефи саз рушарин.
Баркалла хьуй, лап мергьаба,
А гьунарар авур зурба!
Хкаж хьана лап мертеба
Кьалай - къуз цавуз рушарин,
Сад садалай пара гуьзел,
ГьакI чирвални чпин эфсел.
Тади гьалда агакьна зал
Басмадин кагъаз рушарин.
СтIал Сулейман са кьадар
Кефсуз гьал яз, агакьна чар.
Демченко тир са рушан тIвар,
ЧIехи устIар яз рушарин.
Рубрика
Добавить комментарий