Кьве вилинни экв я фяле

Гьукуматдин эвелимжи 
Кьве вилинни экв я фяле, 
И азадвал къачур вичи 
Властдин дирек я фяле.

Гьар патахъай ахъайиз берт 
Залумариз акурла дерт, 
Дустарин арада вич мерд, 
Намус квай бермек я фяле.

Куьгьне залум тир Николай 
Алудмир куьне рикIелай. 
Эй юлдашар, виридай 
Гьахьтин къуз герек я фяле.

Вири махлукьатрин юкьва 
Лежбарариз гзаф мукьва, 
Гьар са юлдашдив алакъа 
Аваз вич куьмек я фяле.

Къваздач хурук четин, залан, 
Дагъларайни чIугваз план. 
Инсанарин юкьва аслан, -  
Гьадалайни зирек я фяле.

Сулейман, дуьз я ви жаваб, 
Фагьумдайда гуда ваз яб. 
Винел пад вич чIулав канаб, 
Къене пад вич пек я фяле.

1925