Жезамач эхиз, Дагъустан

Гагь жеда вун кьуьзуь къужа, 
Лап чуру рехи, Дагъустан. 
Гагь гъиле кьаз буъркьуь ружа, 
Жеда вун пехъи, Дагъустан.

Гьар атайда вегьиз лапIаш, 
Гагь жеда ви тегьер яваш;
Гагь ийиз на дяве, саваш, 
Жеда ваз ашкъи, Дагъустан.

Гагь жеда вун шади - хуррам, 
Гагь гъиле кьаз вуна вагьрам, 
Гагь макъамда жеда тIарам, 
Гагь жеда гъуьргъуь, Дагъустан.

Гагь жеда вун пара алчах, 
Кепекдик вун жедач анжах. 
Гагь ви гьалар жеда юмшагъ, 
Гагь жеда векъи, Дагъустан.

Гагь картар гъиз, гагьни лекьер, 
Гагь жеда вун лап вацIун кьер. 
Бязибуруз вуна рекьер 
Акъудда гьяркьуь, Дагъустан.

Са кIус вуна инсаф ая, 
Кьамир гъиле яцIу пая. 
Гуьзета на эдеб, гьая, 
Хьухь чиниз регъуь, Дагъустан.

Гьар атайдаз хуш я Къафкъаз, 
Тамашиз хъфида яб кьаз, 
Загьирда вун вилер ахъаз, 
БатIинда буьркьуь, Дагъустан.

Гагь акьулдиз жеда наши,
Гагь вун аял жеда гъвечIи, 
Япар аваз жеда биши, 
Гагь жеда чIехи, Дагъустан.

Сулеймана лугьуз бейтер, 
Дугърибур я веревирдер. 
За фагьумна и ви дердер 
Жезамач эхи, Дагъустан.

I9I8 - I9I9