Вад лагьай классда кIелзавай аялриз лезги литературадин тарс атайла хвеши жедай. Тарсунин сифте кьилера махар ачухзавай. Гьар са тарс алукьайла, аялри муаллимдивай чпиз махар ахъаюн тIалабдай. Нубатдин тарсуна муаллимди махарикай ваъ, мисалрикай рахадайди лагьана. Аялризни и кIвалах хуш хьана. “Жуван мез жуваз бала я”, “Цавуз къван вегьена, къванцик кьил кутадайди”. И мисалрин манаяр ачухдайла муаллимди лагьана:
- Месела, Мишадиз (Мирземет тIвар алай гададиз гьакI лугьузвай) са ништIер гьатна. Яни ам ада чуьнуьхнавач, ам жагъанвайди я. Иесини вуж ятIа чизвач. НиштIер вични цIийиди ва багьади тир. Мумкин тир адан иеси Мишадин патав гвай ксарикай сад хьун. Хвешивиляй ада “заз ништIер жагъана” лагьана гьарайна. Гьа и арада гьарамзада Юрика, ам вичинди я (яз аданди тушир) лагьана, ништIер Мишадивай вахчуна. И арада партадихъай къарагъна сефилдиз Мишади икI лагьана:
- Муаллим, заз фицякьра пIирен патавай са иер ништIер жагъанай. Завайни Юриказ лугьун хьайила, ада вичи вахце, ам вичин ништIер я лугьуз, зун гатана, ништIер къакъудна. Мисалда лагьайвал, “зи мез заз бала хьана”. Адаз ихьтин ништIер садрани хьайиди тушир, - хиве кьуна Мишади.
- Я Миша, и кIвалахдикай бес заз гьикI хабар хьана, - хъуьруьн кваз жузуна муаллимди.
- Ваз чир жезвайди я, муаллим. Накь пенжердин шуьше хайидини ваз чир хьанай кьван, - жаваб хгана Мишади.
Роза МИНГЬАЖИДИНОВА
Лезги газет
Добавить комментарий