Туп-лаш къугъвазвай гадайрин рикIел садлагьана чпикай гунагькар вуж ятIа чирун атана. “Кьей рухваяр, чакай ник гзаф гунагьар кватIа?” - хабар кьуна гьамиша са кIвалах ийиз кIандай Алиди. Вири кис хьана. Куьн вучиз кис хьана? Ингье чладин тар. Вуж и тарцин тIеквендай акъатайтIа, гьадак гунагьни квач. Гьа икI лагьана, Али тIеквендай экъечIна. Адан гуьгъуьналлаз са шумуд гадани, цицIер хьиз, экъечIна. Нубат Саруханал атана. Ам якчIар алай аял тир. Кесиб чладин тарцин тIеквенда акIана амукьна, я инихъ экъечI хъжезмачир, я -анихъ. Пагь, аялриз акьван хвеши хьанвай хьи! Къвезвай ван сад тир: Сарухан акIана, гьа-гьа-гьа-гьа! Эхирни, ибурун чIехида, яни уюнбаз Алиди Саруханавай хабар кьада: - Кьей хва, хиве яхъ вуна авур чIуру кIвалахар. Пелез гьекь акъатна зурзазвай Сарухана хиве кьуна:
- За, за чи къунши Таибат халадин кIваляй чукIул чуьнуьхнай.
- Вучиз чуьнуьхна, - лагьана Алиди, - вуна а чукIул къачур чкадал эхцига. Ван хьанани ваз?
- Эхцигда, эхцигда, зун ахкъуд инай, - гьарайна зайиф сесиналди
Сарухана.
Гадайри са гужуналди Сарухан тIеквендай ахкъудна.
Роза МИНГЬАЖИДИНОВА
Лезги газет
Добавить комментарий