КичIе я заз

Къекъведайла гьайкал гвачиз къекъвемир,
КичІе я заз чІал жез вал и шегьерда.
Гьар санал вун зарафатиз, хъуьремир,
КичІе я заз чІал жез вал и шегьерда.

Вун ашкъидин ширин мани, гъезел я,
Юкь закІалдай фидай, хару гуьзел я,
Вун дуьньядин гьам эхир, гьам эвел я,
КичІе я заз чІал жез вал и шегьерда.

Гаф авач ваз: вун зи рикІин хиял я,
ТІавус къуш я, дагъларин са марал я,
Вун зи кьисмет, зи уьмуьр, зи ажал я,
КичІе я заз чІал жез вал и шегьерда.