Гуржидин руш

( Бубайрин тарих рикIеваз кхьей цIарар )

Атана, чан, атана,
Къачагъ лезги атана.
МичIи йифиз гьарай физ,
Гуржидин руш тухвана.

Ишемир, чан, ишемир,
Гуржидин руш, ишемир.
Вилерилай селлер физ,
Ватан рикIел хкимир.

Руш чуьнуьхун къелет я.
Вучда, ам чи адет я.
Зун бубайрин адетриз
Вафалу тир велед я.

За ваз Каспий гьуьл гуда,
Вири Лезги чил гуда.
Кьадар кьисмет сад ийиз,
Дуствилелди гъил гуда.

КIватI хьана эл-гелхенар,
Зи вахарин теменар,
АлкIида ви хъуькъверал
Яру пIузар-жуьгьенар.

Дидеди вун агъмишда -
Вичин тупIал гимишдин,
Бадедини сандухдай
Зар келегъа багъишда.

Пуд йиф, пуд югъ Руьчеда¹ -
Дем жеда чи куьчеда,
Виш йис хьайи къужайри
“Лезгинатдал” къечеда.

Кьадач за вун хелветда,
ЯтIани заз девлетдай.
Цава кьуьлиз картари,
Вун булахрал гуьзетда.

Кстах бала гуржидин,
Тахт туькIуьрна гуьзгуьдин,
ЦIару дагъдин хурахда,
Хуьда вун гелхенвиди.

Къенлай кьулухъ ви Ватан,
Ви юрд-ери - Лезгистан.
Къачагъ лезги гьазур я,
Ваз къурбандиз вичин чан.

Яргъа хьайтIа зун вакай,
Декьикьайра чун чакай,
Гуржи тават, тавакъу я,
Катиз тахьуй вун закай. 
_______________
1. Руьче - Гелхена автор яшамиш жезвай магьле