Кьуьд

Мад са кьуьд атана. Къвазва пурпу жив,
Ацукьзава чилел запундин каф хьиз.
Куьчейра аялри алуднава къив,
Кал ава тевледа худ гуз алафдиз.

Багъда, тама тарарни хьанва хупI чуплах,
Дувулри, хилери къачузвач нефес.
Чарчарри мурк кьазва, ичIи я яйлах,
Хиперин суьруьйрин амачиз ван-сес.

Чуьлдай хквезва бугъ алатна кьуьзуь яц,
Векьив ацIанвай гъел ийизва ял.
Гъил элкъуьриз тик спелрал вичин курквачI,
Лежберди къуьнерихъ вегьенва кавал...

Эхь, серт кьуьд атанва, гатаз вичин хур,
Чаз бул мекьер гъанвай лацу пагьливан.
Мад гатфар хкведайди, къацу хъийиз чIур,
И женжелдиз яраб куьз жезвачтIа аян?..