Эхирдиз тамаш!

Къванерал кхьинар
“Мискьи кас тир вун, - мискьи яз  кьена;
Девлет амукьна, амма вун фена.
Чир хьанайтIа ваз кучуддай къимет, -
Вуна вун кIулаваз тухудай, гьелбет”.
“Къуллугърал хьана, дуьнья тарашна...
Ингье ажалди вунни явашна...
Амукьайди бес эхир вуч хьана? -
КIватIай кьван гьарам вири пуч хьана”.
“Етим, кесибар гзаф курнай на,
Намусдиз кIур гуз, кIвалер чIурнай  на...
Аватна абуруз атIай фуруз вун, -
Кьве юкI агъ гваз фена суруз вун!”
“КIвачер чуьхуьдай коньяк, чехирдай:
ЦIудра мехъернай, амма эхирдай.
Хендеда папар, тавлар амукьна,
Ажалдин дергес вахъни галукьна...”