Кьисмет

( Зарафатдин шиир )

КIвач галкIана алукьна,
Аял шехьиз ацукьна.
Диде серсер амукьна,
РикIик кьамир, минет я,
Кьисмет я ман, кьисмет я.

Куьчебег, рехъ алатна,
Дар духандиз акъатна.
Хизандик цIай акатна,
РикIик кьамир, минет я,
Кьисмет я ман, кьисмет я.

Къуншидин я чIуру гьал,
Акъат хьана кьилиз тIал.
Пуд югъ я къе квахьна кал.
РикIик кьамир, минет я,
Кьисмет я ман, кьисмет я.

Свас ава тек, квахьна чам,
Вирибуруз хьанва гъам.
Къавум ама чухваз кьам.
РикIик кьамир, минет я,
Кьисмет я ман, кьисмет я.

Дамахдай кьван вал, я руш,
Зи гъвергъвер цуьк, ачкар къуш
Зайиф жезва, кумач кьуш...
РикIик кьамир, минет я,
Кьисмет я ман, кьисмет я.

Ихьтин гафар я агъур,
Жува - жуваз це сабур.
Таб туш, гьахъ я заз акур.
РикIик кьамир, минет я,
Кьисмет я ман, кьисмет я.