Кхьизва шиир

Шихнесира ярдикай кхьизва шиир.
Хазинадиз миллетдин хъфизва шиир.
Тарифзава бендеди зардин киферин,
Гъейридан ваъ, талукьдан-ярдин киферин.
Кьилихь фите-назнази, кIвачелни - чекме,
Къветрен ериш къекъуьнар. ТIвар вуж я?
 Секне?
Хуруда гуьл куьбечи - яргъаз физва ван,
Ашукь касдин рикIикай жузаз физва ван.
Кьейидални чан къведа, акуртIа и руш,
Элкъвена мад рекьида, гакьуртIа и руш.
Ван хьайитIа эгер квез вилерин тариф.
Са затIни туш океан-гьуьлерин тариф.
Гуя цавун кIаник хьиз ашкъи-таъсирдин
Вири Кавказ гьукумдик лезги шиирдин.
Шиир кхьей шаирни таъсирдик адан -
Ибн Къафлан Шихнесирни таъсирдик адан.