Хару цуьк

Язух текъвез зун к1евера тваз чида,
Гагь ифириз, гагьни зи рик1 хаз чида.
Вуч ч1угвазва и кар тек са заз чида
Кьилел атай им вуч ч1ана кар я зи,
Са хару цуьк вич бейхабар яр я зи.

Яд акьуна яд хьана зун шекер хьиз,
Вигьизва кам татаб хьайи тегьер хьиз,
Къакъан таран к1ук1 агъузай бегьер хьиз
Вилиз тек чил къалурзавай пар я зи,
Са хару цуьк вич бейхабар яр я зи.

Рик1 галудиз, зурзаз туна пириш хьиз,
Пеле кьац1ар ц1иргъинава бириш хьиз.
Муьгьуьбатдин яд фит1инай ч1ирич1 хьиз
Рехъ ат1айди агьдихъ галай гар я зи,
Са хару цуьк вич бейхабар яр я зи.

Лап макьамда хъиткьин хьана рекъе зи
К1урук1ди хьиз цуьк ахъайна рик1е зи.
Вичиз течиз, мурад хьанва еке зи,
«Лезгинка» дал илигнавай тар я зи
Са хару цуьк вич бейхабар яр я зи.

Пара хьунихъ и дуьньядал фагъир са,
Вири санал к1ват1на жуван фикир за.
Къелемдикай илчи къуна эхир за,
Рекъе турди гугу галай чар я зи,
Са хару цуьк вичиз хабар яр я зи.