Фите хьурай кIантIа кьилихъ,
Я асланд тегьер Фатума.
Белки, жез туш са эркекдихъ
Вахъ авай жигер, Фатума.
Йифди кьуна гъиле тфенг,
Душманарихъ ийида женг.
Кьулухъ элкъвеч диши пеленг
Эркек хьунал гьер, Фатума.
Халкь хьанвачтIан эркеквиле,
Гьарнал авайд я вун гъиле.
Эмир Абдуллагьан диде
Айшадин кьенер, Фатума.
Надир эркек хьиз я къуччагъ,
Вун акурла, катда къачагъ.
Нурлу ийиз бубад ужагъ,
Зумрудни гевгьер, Фатума.
Халкь хьанвайтIа алаз пlaпlax,
Тимур шагьдиз жедай вун тах,
Гила пайгьамбардин пайдах
Гъилевай сердер - Фатума.
Алайд ятIан куьгьне чухва,
Сулейман на кьуна apxa.
Са дидед нек тахъвай стха -
дизни я сенгер, Фатума.
Рубрика
Добавить комментарий