Куз амукьна зун

Акуна ялавдив ацIанвай вилер,
Авуна вилери зуз амукьна зун.
Вилерай вилериз чIуг хьана телер,
Аватна ашкъидин цIуз амукьна зун.

Чиниз килигайла акуна заз цуьк,
Цуькведиз килигна зурзана зи рикI.
Жув жував гумачиз акъвазна вилик,
Са чIав адаз фикир гуз амукьна зун.

Къизилгуьлдин чинал алай чIулав хал
Акуна, кIусни чан амукьнач хьи зал.
Акурла, тупIук квай къизилдин тупIал,
Кам къулухъ чIугуна, куз амукьна зун.