Куьре Мелик

Куьре Меликан яратмишунар юкьван виш йисарин лезги литературадин гьеле чна чеб тамамдиз ахъай тавунвай нурлу ва къизгъин чинар я. Шаир тахминан 1340-1410 йисара яшамиш хьана. Адан девир кьадарсуз заланди тир: чи халкь яшамиш жезвай чилерал са къатда къецепатан чапхунчийри гьужумарзвай. Меликаз Тамерланан кьушунрин тарашчивилер акуна. Куьре Меликакай гзаф риваятар ама. Са бязи риваятри ам Курар шегьердин агьали тирди, муькуьбуру ам курхуьруьнви тирди лугьузва. Са риваятди хабар гузва: «Курхуьр Тамерланан чапхунчийри чукIурайди я. Гьа чIавуз хуьре вири лезгийриз машгьур шаир яшамиш жезвай. Адалай лезгияр сад ийиз ва абурун кьиле акъвазиз алакьнай. Шаирдин тIвар Мелик тир. Меликаз чапхунчийрин патай зулумар акуна. Чпин гъиле гьатайла, душманри ам ярхарнавай чукьвандал кутIунна, кьулаба кьунвай туруналди гатанай, адан хирерив ва вилерив цIай агудиз, къакъуднай. Ахпа шаир зиндандиз гадарна, адаз фу-яд ганач. Амма руьгьдиз чIехи Мелика вири гужар эхна. Лезгийрин кьушунди хуьрер душманрикай азад авурла, ам буьркьуь хьанвай...» Тимурленган кьушунрихъ галаз лезгийри дявеяр авур вахтунда Мелик бажарагъдин кукIушдиз хкаж хьанвай шаир тир. И шаирдикай сифте баянар алим М. Ярагьмедова ганва.Куьре Меликан биография тамамдиз ачухариз гьеле агакьнавач.

Акимов Къ. Х. «Лезги зарияр»