Гъафил жемир, гьич са лежбер,
Кагьул тахьуй гатуз, юлдаш.
Гила вегь на гъиляй а пер,
Гатун цуьлер атIуз, юлдаш.
Кеспидихъай рикIиз кичIез,
ГьакI акъвазмир сакIан тежез,
Вун гвена хьуй, папар - эчIез,
Зарб ая ви ратIруз, юлдаш.
Яхъ ви гъиле фяледин гъил,
Гьич сад садал жемир пехил.
Вахтундамаз жуван техил
Хкваш жуван кIатIуз, юлдаш.
Гьич са тварни тамир чIура.
Хьайи - тахьай жуваз анра
Кьуранамаз на ичIира
Жуван кIатIуз, фуруз, юлдаш.
Эй, юлдаш, лежбер итимар,
Са кIус йигин къачу камар!
Чеб михьи тир хъсан тумар
Вахтунда цуз зулуз, юлдаш.
Завай жедай пис - хъсанни
Чир ийида квезни зани.
Гьукуматдин гьар задани
Алахъ вилик тухуз, юлдаш.
Мад къведа чаз гуьзел гатфар,
Юзуриз билбилди лувар.
СтIал Сулейманан гафар
Авахьрай куь япуз, юлдаш.
1928 - 1929
Добавить комментарий