«Зун партини» - лугьуз

Инсанариз бязибуруз 
КIанзавач инсанвал ийиз. 
Гафар пара ширин къалуз, 
Фикир туш хъсанвал ийиз.

Фагьумна за, са бязибур:
Кепекдихъ маса гуз абур, 
Вичи вич кьаз лап такабур, 
КIанзава уьзданвал ийиз.

Дамах жеда бязибуруг, 
Ажуз кесиб кутаз хурук, 
ГьакI кутаз масад къурхудик, 
Падишагь, султанвал ийиз.

Чидач инсанвилин къайда, 
Уьмуьр ракъуз гьакI гьавайда. 
Калхуз юлдашрин арада 
ГатIунда шейтIанвал ийиз.

Юзуриз гагь - гагь пIузарар. 
КIуф хъуьрез, экъисиз сарар, 
Ажузбуруз гуз кичIерар, 
Вичи гьакI уфтанвал ийиз.

Вич хинни яз, гъуьр хьиз акваз, 
Яргъалай факъир хьиз акваз, 
Вич са умун къуьр хьиз акваз, 
Чинеба - «асланвал» ийиз.

Гафар пара ширин къалуз, 
Ришвет къачуз, руфун дулуз, 
TIвap вичин «партини» лугьуз, 
Куьгьне Мурсал - ханвал ийиз.

Эй, Сулейман, са - сад, са - сад, 
Кьулухъ тамир абрукай мад. 
Регьуьн тавур къуьлуьн шагьад 
Къачуз, регъуьхбанвал ийиз.

I934