Авач кьван куь чанда инсаф

Авач кьван куь чанда инсаф, 
Са зерре мирвет, судуяр. 
Гьич кьабулич кесибдин гаф, 
ТагайтIа ришвет, судуяр.

Сят кIуьда куьн жеда судда, 
Иблисди куьн твада худда, 
Гьахъ гвай кесиб куьне кудда, 
ТагайтIа къимет, судуяр.

Килигиз къвазда куьн чиниз:
Са затI гьат тавурла гъилиз 
Акъудич а дуван кьилиз, 
Кхьиз гуз суьрет, судуяр.

Квез жедайвал за лугьуда:
Шумуд фекъир куьне куда, 
Стха куьне маса гуда, 
ТагайтIа ришвет, судуяр.

ТакIандахъ элкъуьрна далу, 
Кепекдихъ маса гуз халу, 
Ахьтинбурал жибин дулу 
Жедайд туш девлет, судуяр.

Фена икI шумуд замана, 
Эй, фекъир дели - дивана 
Квез авуна Сулеймана, 
Чир хьухь, и туьгьмет, судуяр.

I9I2 - I9I3