Жеч ина ресед - салагъа,
Я эллер, чун инлай чкIин.
Вядед кьванни хуьр элягъа,
Белки, чаз масанал туькIуьн.
Гьикьван ягъайтIан куьне юкI,
Къведач инал я кIан, я кIукI,
Жемятар, куьн инлай чукIукI,
Ая кван квез маса мумкин.
КIватI жеда куьн гьар агъсакъал,
Гъиле кьуна теспягь - къукъвал.
ГьакI нубатсуз из къалмакъал,
Динж куьз тадач куьне мискIин?
Жафа хьана и кент - худа.
Кьве кепек пул туртIа гъута,
Жемятарни маса гуда.
Инсафсузвал вуч я рикIин!
Итим лугьуз вич я хаса,
Эхир на чунни гуд маса,
Гъиле кьуна къукъвад аса,
Им чи винел хьана кескин.
Чир жезмач чаз ийир - тийир.
Гьич гудайд туш им чаз хийир.
СтIал Сулейман я шаир -
ТIем акакьдач ман, за гьикIин!
Рубрика
Добавить комментарий