Фагьума

Фагьум ая, эй мусурман, 
Винеллай парар фагьума.
Мегьти - Загьир, эхирзаман 
Жед лагьай икьрар фагьума.

Эхир сад югъ гъана рикIал, 
Келма - шагьадат ая кIял,
Гзаф кIевид жеда ви кIвал, 
АкъучIдай варар фагьума.

Сад хьиз жед ви йикъар - йифер, 
Гумукьдач вав инин кефер, 
Акъатда ваз яргъал сефер, 
БалкIандин пурар фагьума.

Эй фукъара, куьз я вун лал? 
Дуьз акъваза итимвилал. 
Мягьшердин къуз жуван кьилал 
Къведай кьван крар фагьума.

Я медал авачир, я чин, 
Даим эбед агъа я чин. 
Эй фукъара, гьарда вичин 
Хийирни зарар фагьума.

Вуч атайтIан рахаз сивял, 
Мийир вуна а асивал. 
Аллагьдин гьа вичин садвал -  
Аятдин цlapap фагьума.

Я руьгь авачир, я жасад, 
Гьар са кардикай вич азад, 
Гьелбет, вичел агъзурни сад 
Алай кьван тIварар фагьума.

Вилериз таквадай дуллух 
Гудай касдиз ая къуллугъ. 
Ни халкьна бес и йифни югъ? 
Тамарни тарар фагьума.

Гьелбет, адан вичин кьадар:
Хьайила я ихьтин затIар. 
ЧидачтIа ваз мужизатар, 
Циферни гарар фагьума.

Гьар къадминихъ са пайгъамбар. 
Гьарда гана чаз са хабар. 
Ни гана ваз вилер, япар? -  
Жуван сив, сарар фагьума.

Гафар гуьрчег, амал бетер, 
Мийир чIуру веревирдер. 
Ни тухвана цавуз гъетер? -  
Акьахдай гурар фагьума.

Эй фугъара, фикир чкIай, 
Фагьум ая жуван рикIяй. 
Эвелдай авачир якIай 
ЭкъечIдай чIарар фагьума.

Сулейманан гафар кьезил 
Кьамир - гьарма сад я къизил. 
ЧидачтIа ваз эхир мензил, 
Куьгьне кьван сурар фагьума.

I908