Межид Гьажиев

Машгьур писатель ва таржумачи Гьажиев Межид Жирасович 1929-йисан 14-декабрдиз Докъузпара райондин Къуруш хуьре дидедиз хьана. Ада хуьруьн мектеб, Каспийск шегьердин пешекар училище ва Москвада М. Горькийдин тIварунихъ галай Литературадин институт куьтягьна. Магьачкъалада лезги газетдин, радиодин редакцийра кIвалахна ва "Дуствал" альманахдин редактор хьана.
Писателдин гьикаяйрин сад лагьай кIватIал "Жегьил уьмуьр" 1955-йисуз печатдай акъатна. Гуьгьуьнин йисара ада са жерге повестар ва "Им къван, имни терез" роман кхьена.
М.Гьажиев лезги ва урус чIаларал Магьачкъаладин ва Москвадин чапханайра акъатнавай гьикаяйринни повестрин кIватIалрин: "Дагьлара", "Са булахдай яд хъвайибур", "Гезентидин эхир", "Ирид къаш" ва мсб. автор я. Писателдин эсерар Дагъустандин халкьарин, урус чIалариз таржума авунва.
Зариди Дагъустандин ва урус писателрин эсерар, абурукай яз Расул Гьамзатован "Зи Дагъустан" ктаб , лезги чIалаз элкъуьрна, кIелзавайбурув агакьарна.
М.Гьажиева лезги гьикаят девлетлу авуник ва вилик финик еке пай кутуна. Ам Дагъустан Республикадин СтIал Сулейманан тlварунихъ галай литературадин премиядин лауреат хьана, СССР-дин ПС-дин член тир.
Зари 1985-йисуз кечмиш хьана, Магьачкъалада кучукнава.

Акимов Къ. Х. «Лезги зарияр»