Коляска ва гададин кьиса

Къунши суса лагьана
Вичин гъвеч1и гададиз:
"Чан, са герен и аял
Экъуьриз твах куьчедиз..."

Хьана хвеши гададиз!
Чархар галай гьар са зат1
Акурла ам лувар квай
Чубарук хьиз жеда шад.

Биц1ек авай коляска
Гваз зверна ам куьчедиз.
Дустаризни эверна:
"Куьмека зи пешедиз!"

Коляска туш, машин я,
Ц1ай хьиз физва куьчедай.
Акьаз-акьаз физва ам
Гагь цла, гагь гьачада.

Гагь ягъазва шалмандиз,
Чимзава гагь усуниз.
"Ак1 вучзава?" лагьайла
Гузвач жаваб жузуниз.

-"Тириндилай алудин!
Ша, авудин лекъвендиз!
Ахпа хулай акъудна,
Гьалин къенез туьквендин!"

Гузва ихьтин теклифар,
Хуп1 дустари гададиз.
Коляскада биц1ек шад,
Папари кьил галтадиз.

Гьатна гьарай мягьледа
"Гьа вув!"-лугьуз арадлай.
Амач биц1ек чкадал!
Жагъизва ам кьарадлай...