Гъвеч1и уст1ар

Шумуд варз я чи к1вале
Пайда хьанва са уст1ар.
Гьей экъведа пурчара,
Илис хьана кьада кар.

"Гила вучин?" лугьуз ам,
Гьей экъвезва к1валера.
Хехни шуруп1, мисмарар,
Хъут1а аваз гъилера.

Танхъ!-Хъут1адив илигиз,
Ванер твада бумбадин!
Килигдамаз, ада рак
Хкудзава тумбадин!

И жуьредин "ремонтар"
Физва к1валин гьар пип1е.
Туьк1уьрзава "устадин"
Гьар камуни са "ЧП"

Мажал авач са герен
Я галатун чидай  туш.
К1валин къене экъвезва
Лугьуз:-"гила ийин вуч?"

Кьве йисни гьич  бегьем туш,
И чи гъвеч1и "устадин".
Авурсуз я, ван къведач
Я "бесадин", "бастадин".

Ава диде "устадин"
Лугьуз: "Вучин идан кар?
Квез минет хьуй, са герен
Алуд залай зиянкар."

Амма гьиниз тухвайт1ан
Секин къваздач и "уст1ар".
"Мад вуч ийин?" фикирда,
"За вуч падин, ийин к1ар?"

Машатзава гададиз,
"Ак1мир!" -лугьуз вирида.
Ихьтин "уст1ар"хуьн герек
Лап ч1емеда, гъерида!