Далдамар

Са гъенел кьве далдамар
Им пуд лагьай сефер я.
Са нефсетан гададиз
Свас гъизавай мехъер я.
Сумка, тlаратl, хунчадив
Гьар патахъай атанвай.
Ругуд кlвални сивив кьван
Мугьманарив ацlанвай.

Машинравай гьайванар
Авудзавай Келбиди.
Ацlанавай сумкаяр
Бушарзавай Селмиди.
Балхунра амайбур
Къефле-къефле ацукьриз,
Лугьуз мехъер сагълугъар, 
Кьаз румкаяр галукьриз.

Мукьвал-мукьвал "гъваш" лугьуз
Вилик дулма, як, хьурай.
Тlвар-ван авай нефсетlаз
Мехъер мубарак хьурай.
Гьа арада са виш кас
Мад атана шегьердай.
Гадаярни, рушарни
Галаз мягькем кьуьлердай.
Терекмадал хкадриз
Кьуьлерзавай жегьилриз
Пулдив ацlай жибинар
Кlанзавалда кьезилриз.
Пул атунвай ашкъидив
Кьве ванзава зуьрнеди.
Шабаш лугьуз дал-бадал
Къив гузава Гьемзеди.

Далдамчийрин виликди
Вадар-цlудар бул хьана.
Пуд суткада гьар садаз
Агъзур манат пул хьана.
Мехъер чарче кхьейбур
Кьуд виш касдин тlварар я.
Пlатнусариз вегьейбур
Вири вишен чарар я.

Са пуд кас я мехъер пай
Агакьариз тахьайбур.
Пудкъад гьерни яхцlур мал
Хьана патай атайбур.
Кьве вишни къад "атрезар"
Кьудкъадни сун шал хьана.
Вишни яхцlур буьшмени
Вишни къад адял хьана.

Гьар жуьредин ширинрив
Ацlурнатlан сандухар,
И чlехи райондивай
Мадни хьанач ам тухар.
Шаир Кьилегь Къудрата
Лап рикl алаз тамашна.
Къарид галаз кьуьл ийиз
Са виш манат шабашна.