Чакай гьим ятIа

Са нянихъ бубади
Хтулдиз икI лагьана:
-Сигаретар кьачI галай,
На чIугваз икI датIана...
Адав гуьр хьайи инсан
Пиянди хьиз, "дем" жеда,
Кьур акъатна келледай,
Акьулдикай кем жеда.

ГьакI тирвиляй, сигарет,
За кьурди туш гъилени.
Бес на вучиз чIугвазва
Мектебдани, кIвалени?
Чаз чи муаллимрикай
КичIедай лап кьадарсуз.
Вучиз гилан аялар,
Хьанва икьван гьаясуз?

Ван хьайила и гафар
Адан япал атана
Хъуьрез-хъуьрез бубадиз,
Хтулди икI лагьана:
-Им сир туш хьи, чан буба,
Квез чизва, квез аквазва.
Чи муаллимди вичини,
Чавай къачуз чIугвазва.

Чаз чир тахьай, и мектеб,
Мектеб ятIа, ким ятIа?
Гила асул гьаясуз,
На лагь, чакай гьим ятIа?!