Стlал Сулейман

Сажидин
ГЕРЕК Я
Девиррилай девирдалди лув гана,
Катзава вахт, женгер хьана тарихдин.
Шумуд душман вичи кягъай цIув гана,
Дагъви халкьдин сирер чирна къилихдин.
Эхиз тежер гужар акур вахтуна,
Садвал хуьнуьх чи бахтунин куьлег я!
Лезгистандин тIвар хуьн патал Тахтуна,
Гьар девирда Шарвилияр герек я!

Шагь-дагъ, Шалбуз, Земземдин яд Самурдин,
Азадвилин даяхар я, даяхар!
Лезги халкьдин абурлувал сабурдин,
Берекатрин булахар я, булахар!
Багьа я чаз са кап кьван чил, ругни кваз,
Адан гьар къван, кик1ални кваз куьмек я.
Хуьн паталди тара авай мугни кваз,
Гьар девирда Шарвилияр герек я!

Гъетерихъ кьван авай буйдин кьакьанвал,
Къагьриманар ава Лезги Ватанда!
Гьам Зегьметда, гьам Женгина кIубанвал,
Эбеди яз хуьзва чна чи чанда!
Дуствилер хуьз, Къадим Лезги адетар,
Хкахь тийир цIай рикIе хуьз зирек я!
Сад хьун патал Дагъустандин миллетар,
Гьар девирда Шарвилияр герек я!

Ислягь уьмуьр хуьн паталди, чан гана,
Къейи ксар – Игитар я, Игитар!
Чапхунчияр терг хьайила, къван гана,
Руьгь амачир мийитар я, мийитар!
Гъед тиртIа ам, ивичIнавай чилерал?
Шарвилиди къалурай Рехъ, Экв я чаз!
Ашукь жедай Ватандални Эллерал,
Гьар девирда Шарвилияр герек я!

Сулейманан къизилдин сес,
Заз мад сефер ван атана.
Лап рик1ивай хиве кьан квез,
Хкаж хьана руьгьдин гьевес,
Рекьин тийир чан атана.

Сагъ хьурай вун чи Сулейман,
Вун зи к1вализ кьван атана.
Вун хьана зи т1алдиз дарман.
Шаирвилин гана фарман,
Рекьн тийир чан атана.