Лезгийрин революциядин вилик квай девиррин литература

Хгягъай эсерар

Ктаб туькIуьрайди ва адаз сифте гаф кхьейди Гь. Гьашаров я

Махачкала, Дагучпедгиз, 1990

Лезгийрин литература къадим девирра арадал атана. Кавказдин Албания гьукуматдин кьилин халкьарикай сад хьайи чи халкьдихъни (а вахтара кIел-кхьинни арадал гъанвайди алимри тестикьарнава) шаирар, ашукьар... хьанай. Гьайиф хьи, абур гьелелиг майдандиз ахкъуднавач, гьилин хатIарин ва чапнавай куьгьне ктабар, дафтарар, абур хуьзвай маканриз фена, ахтармишнавач. Чал юкьван виш йисарин ва гуьгъуьнин девиррин шаирррикай малуматар ва абурун эсерар агакьнава. А девиррин шаирри чпин эсерар араб, азербайжан ва дидед чIаларалди яратмишнай. Абурун арада гьам динэгьли, гьамни прогрессдин терефдарар хьайи шаирар авай. И шаиррикай са кьадарбур халкьдин дерин къатарай акъатайбур ва зегьметчийриз къуллугъ авурбур я....