Ракъинин муг

Гьаким Къурбан

Роман-трилогия.

Магьачкъала: Дагъустандин ктабрин издательство, 2018. - 715 ч.

Гьаким Къурбанан «Ракъинин муг» лезги халкьдикай теснифнавай, виш йисан девир кьунвай, гьикаятдин ч1ехи эсер - роман-трилогия я. Ам 3 романдикай ибарат хьанва, алатай асирда печатдай акъатна: «Асиррин рехъ» (1984), «Четин бахт» (1987) ва «Хважамжам» (1993). Сад лагьай романдин гьерекатар XIX асирдин эхиримжи ва XX асирдин сифте йисара Муг-Рагъ хуьре, Бакуда, Дербентда, Темир-Хан-Шурада, Ахцегьа ва Тахтахуьре кьиле физва. Зариди дагъвийрин кесиб уьмуьр, нафт1адин мяденра к1валахзавай фялейрин агъур зегьмет, абурун азадвал патал большевикри ч1угвазвай къати женгер бажарагълудаказ къалурнава.
Кьвед лагьай романдин гьерекатар ХХ асирдин 1917-1941-йисара Дагъустандин хуьрерарни шегьерра кьиле физва. Авторди Дагъустанда Советрин власть тестикьарзавай, граждан дяведин, колхозар тешкилзавай йисарикай,
тарихдин делилрал бинелу хьана, фасагьатвилелди суьгьбетзава. Пуд лагьай романдин гьерекатар Лезгистанда кьиле физва, ам Ватандин Ч1ехи дяведин ва гуьгъуьнин йисариз бахшнава. Лезги рухвайри ва рушари Ватан
душманрикай хвейивал, дяведин йисара чк1ай майишат гуьнгуьна хутазвайвал къалурзава.
Роман-трилогияда халкьдин къагьриман рухвайрин: Сфи-эфендидин, Къази-Мегьамедан, Мукьтадиран, Абидинан, Самсаман, Къамкъаман, Нуфталидин, Шабузан, Алиметан, Мурсалан, Сижаратан, Санжадин ва мсб. рик1ел аламукьдай къаматар ганва. Феодализмдин, капитализмдин ва социализмдин шарт1ара гъвеч1и халкьдин кьадар-кьисмет веревирдзава.
«Ракъинин муг» роман-трилогиядиз дуьзгуьн композиция, акси къуватрин хци акьунар, жанлу къаматар ва литературадин девлетлу ч1ал хас я. «Ракъини муг» - лезги литературада сад лагьай роман-трилогия я. Адаз алимри,
критикри, к1елзавайбуру: Гь. Гашарова, Дж. Джамалова, М. Джалилова, К. Казимова, М. Мифталиева, Ф. Несрединова, С. Османовади, Гь. Рамалданова, Ш. Шихмурадова ва мсб. виниз тир къимет гана. С. Алиевади кандидатвилин диссертация хвена, «Гьаким Къурбанан «Ракъинин муг» роман-трилогиядин
поэтика» ктаб басмадай акъудна (2007).
Издательстводи «Ракъинин муг» роман-трилогия сифте яз, пуд ктабни санал, автордин 80 йис тамам хьуниз талукьарна, акъудзава.