Лезгийрин фольклор

Ктаб туькIуьрайбур Гь. Гь. Гашаров ва А. А. Рашидов я.
Ктабдиз сифте гаф кхьейди Гь. Гь. Гашаров я.

Школайрин илимдинни ахтармишунрин институтдин издательство.
Магьачкъала 1999

Фольклор халкьдин виш йисарин уьмуьрдин тежриба, чир-вилерин хазина ва зурба девлет я. Несилрилай несилрал, сиверай сивериз къвез, адет хьанвай къайдайра ва кIалубра хуралай ва гуьрчегдиз туькIуьр хьанвай, дерин манадин эсерриз халкьдин сивин яратмишунар, яни фольклор лугьуда.
Фольклордин эсерар халкьдин уьмуьрдихъ ва тарихдихъ галаз кIевелай алакъалу я, гьавиляй фольклордай халкьдин ацукьун-къарагъун, дерди-бала, дуьньядикай фикирар, хиялар, адан марифат ва художественный къанажагь гуьзгуьдай хьиз аквазва.
Лезгийрихъ девлетлу фольклор ава. Ана пешапаярни алапехъер, лайлаярни мехъерин манияр, ишеларни къурабайрин манияр, эпический эсерарни тарихдин манияр, мисаларни мискIалар, кинарни къаргьишар, хордин маниярни бендер, риваятарни махар, хкетарни къаравилияр гьалтзава....