Вуч хъсан я!

Зи устад Забит Ризванован экуь руьгьдиз бахшзава.

Гатфар бере ц1ай-алпандин гугрумдин ван вуч хъсан я!
Дидед ч1алан нефес галай хайи ватан вуч хъсан я!

Лезги ч1алал мани чк1из генг чуьллериз, шад эллериз,
Азадвилиз эвер гузвай Сувар Яран вуч хъсан я!

Ак1 жеда хьи, гъетери заз эвер гузва лезги ч1алал
Патав хьайла к1ани ярни рик1из масан, вуч хъсан я!

Чи дидейри кьеп1ин кьилел тамамарда бул лайлаяр,
Ихьтин верци мани-макьам мадни аван?Вуч хъсан я!

Гагь ишехьиз, милиз хъуьрез, "диде-диде", "буба-буба"
Лугьуз сифте ч1ал къвезавай баладин чан вуч хъсан я!

Чарад ч1алал дамахзавай "агъуз" ксар негьин чна,
Пехъ алачир, агакьдачир сувар кьакьан вуч хъсан я!

Эй Шагьмардан, камар т1арам вегьез экъуьгъ и дуьняда!
Дидед ч1алан ванер авай чими хизан вуч хъсан я!