Хуьруьг Лукьман (Алискеров Лукьман) 1921-йисан 13-июндиз Ахцегь райондин Хуьруьг хуьре дидедиз хьана. Юкьван школа куьтягьна, сагъсузвал себеб яз, Лукьман хуьре лежбервилел ва устIарвилел машгъул хьана.
X. Лукьмана жегьил вахтарилай шиирар кхьизвай. Адан къелемдикай жуьреба-жуьре жанрайрин эсерар ('Яру кIек", "Хьанайтlа", "Автобусда", "Келемар", "Зи ктабдиз" ва мсб. ) хкатнава. Абур газетриз ва журналриз, "Рагъ" тIвар алай ктаб яз акъатна. Заридин яратмишунриз Хуьруьг Тагьиран эсерри еке таъсир авуна.
X. Лукьман 1988-йисуз яргъалди чIугур залан азардик кечмиш хьана, хайи хуьре кучукнава.
Акимов Къ. Х. «Лезги зарияр»
Рубрика
Комментарии
18.12.2015
Гьайиф Садуллагь!
Билбилди хьиз шад лугьудай уст1вар
Садуллагь амач, азиз тир дустар!
И пис хабарди рик! авуна т!ар
Гьар сад алайнал хьана хьи чун къагь
Гьайия Садуллагь! Гьайиф Садуллагь!
Чунгур гъилеваз килигиз къавуз,
Ширин ачух сес хкажна цавуз,
Ватандикай шад лугьудай ч!авуз,
Гьикьван чаз гужлу эсер гудай пагь
Гьайиф Садуллагь! Гьайиф Садуллагь!
Чи агалкьунар къалурун патал,
Галатун вичиз тийижиз мискьал
Жедай ам даим сегьнедин юкьвал,
Халкьар шад авур гур межлисрин шагь
Гьайиф Садуллагь! Гьайиф Садуллагь!
Нац!ун к!алам хьиз уьтквем итим вич
Хьана хьи вахтсуз дуьньядилай куьч.
Са тегьерни мад сабур техжез гьич
Зи рик! пад жезва, за вучдат!а лагь
Гьайиф Садуллагь! Гьайиф Садуллагь!
Масан тир ашукь, чунгурдин ийес
Им халкьдиз еке квахьун тушни бес?
Гьинай хьирай чаз мад ви ширин сес
Амач хьи азиз, амач хьи вун агь!
Гьайиф Садуллагь! Гьайиф Садуллагь!
Хуьруьг Лукьман 1952-йис.
И шиир Ашукь Садуллагь регьметдиз фейила кхьенвайди я.
18.12.2015
Эй кьуьзуь кас.
Кимерал я вун лап кваса
межлисра жув хьайи гьар са
фикир тагуз зи ад маса
гумир вуна эй кьуьзуь кас!
Гафунин кьат1 сиве амаз,
куьз элкъуьрда зал ч1улав маз,
Амай халкьар икьван саймаз
кьумир вуна эй кьуьзуь кас.
Вун ч1ехи я бес за вучин-
чара тежез кварни гечин
буш ч1аларив нагьакь зи чин,
кумир вуна эй кьуьзуь кас.
Ви гьакьсуз тир гафар закай,
низ хуш къведа инал чакай?
Ик1 гьавая зи рик1 вакай
хумир вуна эй кьуьзуь кас.
Амачиз са сасни сиве,
к1анзава ваз жакьваз деве.
Гьар сана жув ихьтин к1еве-
тумир вуна эй кьуьзуь кас.
Хуьруьг Лукьман.1940-йис.
18.12.2015
Къарагъ-дустар!
Къарагъ дустар! Гьужумнава Ватандал
Пехъи хьанвай душманди кьил кьутана.
Алчахвилел квадарнавай инсанвал
Кук1вар авун лазим я ам гатана.
Анжах гуж я а залумдиз герекди
Акьул адахъ авай туш.Я хьайи туш.
Шумудра чи рак гатана фелекри
Амма чна садазни рей гайи туш.
К1вал тарашиз ик1 хабарсуз къведайди
Пехъи киц1ни анжах ягьсуз угъри я.
Къанлу Гитлер-инсандин як недайди
Ам дуьньядин мурдарвилер вири я.
Еке чуьллер, дагълар, тамар, дереяр
Ислягь халкьдин мейитривди ац1урна,
Авадарна вичин ни гвай гъураяр
Европадин чилер ада кьац1урна.
Къарагъ дустар чал атанва а ялав
Элкъуьриз к1анз чун лал хьанвай лук1ариз.
Къарагъ дустар югъ, йиф чна гун къилав
Адаз лайих палтайризни як1вариз!
Шарвилидин тур жагъура лезгияр
Т1алабзава ам дяведин зенгини.
Сали Сулейманан руьгь квай аварар
Шамила квез эверзава женгиниз.
Надир-Шагьдин тифти цавуз акъудай
Эй зи кьегьял Дагъустандин асланар!
Ц1ай кутуна душмандик чан къачудай
Ша руьхъ ийин фашизмадин планар!
Хуьруьг Лукьман 1941 йис
18.12.2015
Лазим я.
Куьз герек я зи ник ви ник,
Акахьна сад хьун лазим я.
Кут1а мукал дергесни кьуьк
санал хутда тун лазим я.
Садахъ авач са капни чил
амукьзава т1ушаз кьве гъил.
Сада кьунва еке са чуьл-
инсаф рик1ел гъун лазим я.
Бес квачни а чилик зи пай?
Гьавая зай акъудмир ц1ай.
Дуствал дак1ан гьар са кьац1ай-
иландин юкь хун лазим я.
Чара тежез ракьни къеле,
кесиб серсер жемир к1вале.
И женгина чи гъил-гъиле
мягькемдаказ кьун лазим я.
Колхоз патал хуьруьн къене
Зун шад я сес гунал куьне.
Кук1варна сергьятар куьгьне
Виринра тум цун лазим я!
Хуьруьг Лукьман. 1936-йис.
И шиир хуьре колхоз тешкил авун патал к1ват1 хьайи жемиятдин собраниядал лагьайди я.
А вахтунда шаирдин ц1увад йис тир.
18.12.2015
Хуьруьг Лукьмана гзаф шиирар кхьенвайди я. Адах халкьдиз чизвайбурулай гъейри политикадикай, к!анивиликай, басняяр ва сатираяр ава. Заз гзаф шиирар аквазва маса буру кхьенвай дегишар хъувуна амма абур Лукьманан гафар я. Чарадан гафар жуван к!вачих кхьин хъсан кар яз заз аквазвач. Им регьятдаказ субут (доказат) жезвай кар я. Мукьвара адан са ктаб акъатда.
05.06.2024
Гьуьрметлу кlелзавайбур ва лезги шииратдиз къимет гузвайбур. Эгер квез интересный ятlа ХЛукьманан эсерар сылкада подписаться хьухь.https://t.me/aliskerov2611.
05.06.2024
Гьуьрметлу админ, завай куь сайтдиз гьахьаз хьанач. Эгер квез хуш акуртlа а каналдай шиирар къачуна эциг гьина.
Добавить комментарий