Рекьер

Ракьун рекьер, накьвад рекьер, жигъирар...
Чи патарай рекьер физва гьар жуьре,
Лап яргъариз тухузава жегьилар,
Иер рушар амукьзава тек хуьре.

Ракьун рекьер, накьвад рекьер, жигъирар,
Хабар квачиз уьмуьр физва рекьера.
Тади галаз, жагъидай хьиз къизилар,
Физва инсан къванерайни векьерай.

Рекьер ава канивилив ац1анвай,
Гьижранд мурк1ар ашкъидивди ц1урурдай.
Рекьер ава хаинвилив кьац1анвай,
Инсандин т1вар хабар квачиз кьац1урдай.

Ц1елхемрикай ц1ийи эквер куьк1уьрин,
Ц1алц1амарна гелераллай биришар,
Ша, инсанар, пак ниятдив туьк1уьрин
Ракьун рекьер,накьвад рекьер,жигъирар!