И чаравал сефил чандиз тарс хьанва

Вун такуна, рик1 азизди, варз хьанва,
Йифиз зи т1ем гьетер хьанва, Варз хьанва,
Вун я чирагъ зи илгьамдин мич1ериз,
И чаравал  сефил чандиз тарс хьанва.

Сенфиз цавай  куь багъдиз гъед аватна,
Адахъ галаз тандикай чан   къакъатна,
Яраб зун ви рик1ин къеняй акъатна?
И чаравал  сефил чандиз тарс хьанва.

Йикъа вишра куь мягьледай физва зун,
Аламатдин са ялуни гьизва зун,
Къундахдавай биц1идазни чизва зун,
И чаравал  сефил чандиз тарс хьанва.

Куь регъелда кьуру пешер нуьк1вер хьиз,
Аквазва заз, сверк1вер иер цуьквер хьиз,
Ч1уру жумар хъуьтуьл верци чуьхвер хьиз,
И чаравал  сефил чандиз тарс хьанва.

Шагьмардан,вун ашкъидикай галатмир,
Канидилай, гъил къачумир, алатмир,
И дуьнядин дамах ашкъ я гьич катмир,
И чаравал  сефил чандиз тарс хьанва.