Кьве гъед

Са гъед цава кузва ц1ай хьиз куьк1вена,
Хкахь тийир гележегдин чирагъ яз,
Мич1и йифиз рехъ къалуриз кьилел зи,
Жеда даим зи уьмуьрдин са рагъ яз.

Ичин багъда гуьруьшда чун авайла,
Анжах вун тир чи муьгьуьббат акурди,
К1ани рушан сивел темен алк1айла,
Вун тир цавай заз мили хъвер авурди.

Зи гьиссерин са пай вуна къакъудна,
Абур къени есир хьанва рекье ви.
Зи Зуьгьре гъед,вав зи ашкъи агудна,
На уьмуьрдин чка кьуна рик1е зи.

Ак1 я хьи заз, вилери вун "недайла",
К1ани рушаз тешпигь хьана ава вун,
Зи экуь гъед,яр къужахдиз къведайла,
Ак1 я хьи заз,зи гъилерал ала вун.

Гьам т1варарни,гьам рангарни сад я куьн-
Кьве гъед санлай зи ашкъидин лувар я,
Зи муьгьуьббат къакъудунал шад я куьн,
Зи илгьам куь туьхуьн тийир нурар я!