Лагь

Дуьнья   мичIи  аквазавай,   жуван  йикъар  мичIи  я  лагь,
Масдан фу нез уьмуьрзавай,  жуван  крар  гъвечIи я  лагь.
 
Гъилевайди ахъайна гьакI, цававайдахъ къекъвез тагьуй,
ИчIи   шишел    ацурзавай,    жуван    чанар   ичIи  я  лагь.
 
Пиши   жеда   япар  эгер, ван  тахьайтIа   цIийи  са  гаф,
Гьар  са  жуьре  ван текъведай, жуван япар гуьчIи я лагь.
 
Дуст   авайдаз   и   дуьньяда,  кулавай  пар  кьезил  жеда,
Дар   чIавариз  даях  тахьай, жуван  дустар  пичи я лагь.
 
Пехилвализ  гьар  са  куьнал,  гегекI ийиз  кар къуншидал,
Кам   гуьгъуьна  амукьнавай, жуван  камар кьецIи  я  лагь.
 
Туринин   хер  фад  алатда,  мецин   хер я  гьич алатдач,
Гапурди  хьиз  атIузавай  жуван  туьгьметар хцIи я лагь.
 
Сархан    вуна   и   цIарариз  фикир    галаз  гана  фагьум,
РикI  зурзуриз  лугьузавай ,  жуван  гафар  верцIи  я  лагь.
 

27.11.2012