Ни чирда

«Квекай жезва, чан диде, фу ?»--
Хабар кьазва аялди, 
«Гъуьрни къуьлни гьинай къвезва,
Гьина цазва, квел ва ни?»

Четин я заз жавабар гуз,
Суалри ат1узва рик1,
Агьалияр яз хуьрерин
Авамвилиз вучда, гьик1!

Карагзава вилерикай
Лепе гузвай къуьлуьн ник,
Бул магьсулрив ац1анвай рат,
Векьин к1унт1ар кьунвай тик.

Цанар цадай тракторар,
Мад машинар пара тир,
Чирдай къадир къуьлуьн тварцин
Ч1ехи бубад багьа тир.

«Баркаван фу чи суфрадик
Квачир вахт квез такурай», --
Лугьуз бадед атирлу "варз" 
Т1анурдай чав вугудай.

Т1урар гудай къелемлухра,
Ичин, шефтел, хутарин,
Еке ашкъи, гьевес аваз
Бегьер к1ват1дай багъларин.

Къимет амач къе лежбердиз,
Хуьзва халкьар базарри,
Нек1ер, ч1емер амач халис,
Гьелекзава азарри.

Жанлу ч1улав накьвар хайи
Шумуд йисар я хамдиз
Вуч чешне яз тада чна
Гележегдин аямдиз.

Туна хизан, к1вал, хуьрни ч1ал
Гъурбатда хуьз жедан кьил,
Ни чирда чи аялриз къуьл,
Гергер, сил, амай техил?