Къияс Межидов

Дагъустандин халкьдин писатель Межидов Къияс Межидович 1911-йисуз Самур округдин Ахцегь хуьре дидедиз хьана. Аял вахтар Бакуда акъатна. Ина ада мектебда кIелна, сифте эсерар теснифна ва литературадин кIватIалда иштиракна. Дагъустандиз хтайла, лезги мектебра тарсар гана, газетрин редакцийра ва прокуратурадин идарайра кIвалахна.
Къияс Межидов литературадиз шаир яз атана, адан шиирар "Цlийи дуьнья" газетдин чинриз 1929-йисалай акъатиз башламишна. ТIебиатдал рикI алай жегьил гьикаятдин эсерар теснифунал элячIна: къушарикай, гьайванрикай, тIебиатдикай са жерге гьикаяяр кхьена, "Зи гъвечIи дустариз", "Лувар квай дустар" "Лувар квай Алуш" ва маса тlварар алай кIватIалар печатдай акъудна.
Тежриба ва устадвал артух хьайила, писателдин къелемдикай кIелзавайбурун фикир желб авур повестар ("Дагъларин аялар", "Дагълар юзазва", "Птул руш" ва мсб.) ва романар ("Кьашкьа духтур", "Дагъларин деринрин булахар" ва "Хайи чилин таватар") хкатна. Абуру лезги гьикаят хейлин девлетлу авуна ва вилик тухвана.
Къ.Межидова са жерге пьесаярни кхьена: "Бубаяр", "Партизандин хзан", "Ашукь Сайд" (X.Тагьирахъ галаз санал), "Урусатдин цуьк" ва мсб.
Къияс Межидов "Дагъустандин халкьдин писатель" тIварцIиз, "Гьуьрметдин знак" ордендиз ва медалриз лайихлу хьана. Ам 1957-йисалай СССР-дин писателрин союздин член тир.
Зари 1974-йисуз Ахцегьа кечмиш хьана.

Акимов Къ. Х. «Лезги зарияр»